Siploh Boh Tanda Kiamat

NAZAM TGK CHIK TANOH ABE..

Siploeh yang rayek, tanda kiamat
Nabi Muhammad, na geu meusabda
Oh katroeh wate, katoe kiamat
Geubi alamat, Siploeh boh tanda

Tanda yang keuphoen, Nabi hareutoe
Rata jeut Nanggroe, kayem that geumpa
Tanda keu dua, meunan cit bagoe
Rata jeut Nanggroe, jie ek ie raya

Tanda yang keulhee, wahee dum kawoem
Keudee dum tutong, dusoen ngoen kota
Rata jeut Nanggroe, tadeungoe tutoeng
Kota ngoen gampong, bandum seureuta

Tanda yang keupeut, adun ngon adoe
Rata jeut Nanggroe, meuprang saudara
Kafe ngoen kafe, hana reuda prang
Ureung iseulam, pih sama saja

Tanda keulimoeng, wahee dum sahbat
Rata jeut teumpat, keudee meubanja
Kateudoeng keudee, rata jeut tempat
Meukat makanan, pue-pue yang hawa

Tanda yang keunam, wahee eo rakan
Dilee gasin that, jinoe ka kaya
Jinoe ka kaya, hareuta jai that
Rumoeh meutingkat, jeundela kaca

Tanda keutujoeh, hai bungoeng iboh
Dilee kaya that, jinoe ka papa
Hareuta tanle, blang deungoen lampoh
Ciet tinggai tuboh, hudep seungsara

Tanda keulapan, geu kheun le Nabi
Ureung ek Haji, rame lagoina
Ramee meuleupah, ureung ek haji
ladoem peng suci, ladoem peng riba

Ladoem yang kaya ,bak cok tong judi
Meutamah lagi, agen bak cina
Ladom yang kaya, bak agen candu
Na yang meukat bu, buleun puasa,

Asai ka kaya, laju u Meukkah,
Bateu deungoen sah,  hana jie kira
Yang peunteng leupah, u tanoh suci
Kutoe ngon suci, hanjuet peukara

Tanda sikureung, leumpah geot reugam
Inong ngoen agam, hana le beda
Inong soek leweu, agam panyang oe'k
Ka sapu anggoek, ka sama rata

Ta eu soek leuweu, sang aneuk agam
Ta nging ok panyang, sang aneuk dara
Bek keude kupi, ule jie tumpang
Beungoh ngon malam, peutupat haba

Tanda keusiploeh, Nabi riwayat
Rakyat meularat, duson  ngon banda
Ureung yang meukat, palak jih thah-that
Kaji cok pajak, meulipat ganda

Nibak masa nyan, hana so pakoe
Peumimpin Nanggroe, ade tan le na
Rakyat lam marit, hana soe hiroe
Gadoh meukeudroe, dalam istana

Rakyat ban kameng, ikat lam uroe
Pemimpin Nanggroe, buas ban Singa
Oh bacut salah, rakyat lam Nanggroe
Boh bajoe beusoe, jitroem jitampa

Nyoe han ta turoet, lagee ji peugah
Keuneong beureukah, masoek peunjara
bandum beuta turot, lagee  ji peugah
Neunyoe ta bantah, kinong ilainya (aniaya)

Rakyat lam Nanggroe, dum teuhah babah
Lagee kameng grah, dalam uroe kha
Nibak masa nyan, han ek soe pike
Ulama jahee, masa nyan teuka

Ulama jahee, lumpah that kaplat
Hadis ngoen ayat, di tuka-tuka
Ulama jahee, lumpah that dengki
Sabee di caci, alam pusaka

Bak hadis za'if, sinan di meudoeng
Laen bandum keon, han di peucaya
Ji khuen bideu'ah, keu ahli hukom
Ji tuding langsong, jie peugah sara

Aneuk peusantren, di peugah salah
Watee khutubah, di thok-thok dada
Di surah hukoem, yang salah-salah
Di mita meugah, bak ureung donya

Oh no keuh meuteong, tanda yangg siploeh
Aleh ciet ka troeh, cie neu peunyata???
Yang karang Nazam, Tgk. Chiek Tanoh Abee
bak thoen siribee, lapan ploh dua.

Pena Kinet BE