Jipot angen gle ka padam suloh
Buluen di jioh leumah hana le
Lon paban buhu episode keu tujoh
Teuntang meunaloh ceuding boh Pade
"Meuheut meunikah," judoel ulon boh
Seunambong suroh di dalam syah'e
Untok pembaca nyang toe ngon jioh
Keunoe neu piyoh sigra neu hade
Allah Ayah eo hate lon lusoh
Basoe ngon tuboh saket bukon le
Gaseh lon ikat jinoe ka putoh
Meuseubab hantroh neu restu kande
Ingat Tjung bang droe di duson jioh
Badan ka awoh lam ruyang-raye
Baroe jie peugah le sinyak Raoh
Abang ka seungkoh meurana hate
Seulanga muda keumbe ka duroh
Meuseubab putoh cinta lam hate
Meuthuen kuliah dua thon tanggoh
Ayah neu suroh yue koh seulangke
Sinyak Julaiha meunyeusai sunggoh
Seubab hana troh jie meuduk jure
Meuheut meunikah ngon abang tanggoh
Akhee jieh putoh hana jadeh le
Poto keunangan kabeh jie sampoh
Ka jitiek lam broh mandum hana le
Jie balah peusan ngon jaroe siploh
Meunoe jie ratoh sinyak boehate
Meu'ah hai kanda Raja di baroh
Peusan ulon boh nyoe lewat hape
Dinda di sinoe meunyeusai sunggoh
Gaseh ka putoh cinta ka ce-bre
Nibak Tjut abang dinda jok tanggoh
Tempoe seumeulhoh jioh bukon le
Lon harap kanda rindu bek putoh
Rihon bek leusoh keu dek boehate
Gaseh bak dinda seudia han troh
Meuseubab suroh meukaleung fih'e
Ayah poma lon macam geu ratoh
Han-ek hai bang beh lon peuthuen hate
Lon lake meu'ah ngon jaroe siploh
Hai teurang buloh peunawa hate
Hanjuet lon mariet eo tabib Agoh
ie mata jatoh bak mieng ka jile
Meunan jie mariet bungong seuleupoh
Lam peusan jiboh keu bang boehate
Hate ka sungoe baten ka seupoh
Gaseh meutaroh putoh keulike
Hai Krueseumangat Mawoe di lampoh
Ka teu-choep tumboh u dalam hate
Luka meudarah lam jantong layoh
Gaseh ka putoh han jie riwang le
Tjut bang ka geujak u Nanggroe jioh
Ka geuboet sa'oh bak Jaloe kawe
Layeu geu reuntang geugot Peungayoh
Geu lingkeu aroh laot deungon gle
Seu'ot Tjut abang eo bungong leupoh
Dingoe adoe beh lon balah syah'e
Bekle ta keunang gaseh nyang putoh
Kajeut adek beh gata toep hate
Saket lon rasa meurana tuboh
Hudep lon seungkoh lam ruyang-raye
Karena gata, ta bateu tanggoh
Lon tanggong lusoh baten ngon lahe
Male ulon tueng hai siret Pawoh
Urueng peucoh-coh jie sinde-sinde
Jie pansi haba mameh ngon haloh
Punyung beureutoh han-ek lon thuen le
Leubeuh goet neu'im hai pulin Jaloh
Bek neu meuratoh masalah hate
Bahle lon lupa wajah seuleupoh
Mandum lon sampoh gamba lam hape
Meunan geu balah Raja di baroh
Peusan geu peutroh bak putroe kande
Adoe boehate meurana sunggoh
Jinoe ka layoh keumang Rangkile
Seukian dile haba lon ratoh
Meu'ah lon peutroh duson deungon gle
Meunyoe na sajak han jikap huroh
Tuloeng rakan beh peubutoi syah'e.
Bireuen, 03 Februari 2019.
Kinet BE
Posting Komentar