Judul: Meuhuet Meunikah 3
Peunuleh: Adam Zainal
Meu kruseumangat, lamat lam rambang
Izin loen tuan, jak tuleh syah e
Teuntang seulason, bungong lam karang
Yang hawa badan, jak lisi seupre
Episode keu lhee, rande loen sumbang
Sambungan lisan, rakan boehate
Teuntang sijudoe, meu jok lamaran
Keu bungong intan, pujaan hate
Wahee eo adek, cantek rupawan
Kiban loen paban, haba ka lanjee
Pakon watee phon, neujok paksaan
Sigra lamaran, neuyu cok kande ?
Watee di kanda, ka siap badan
Wareh ngon taulan, ka siap hadee
Gata ka linglung, hai adoe sayang
Tabi alasan, meu macam fih e
Kanda ta tulak, seurak lam gawang
Meunan tamselan, neu tipu hate
Ban ka troh wate, loen mee lamaran
Gata dek sayang, ka han tatem lee
Meupu salah loen, keumbee ilalang
Ta siksa badan, luka lam hate
Malee ngon kawoem, ngon rakan rakan
Batal lamaran, seudeh bukon lee
Andai loen teupu, meunoe piasan
Yoeh dile sayang, han uloen ukee
Gaseh ngon cinta, meuwoe gurawan
Dalam suratan, nestapa hate
Meunan geu mariet, seuit cut abang
Bak sang meu linang, ie mata jie lee
Dusta bak bibi, kande boh mancang
Madu manisan, gantoe ie batree
Wahee eo kanda, rupa yang tampan
Meuah cut intan, hai bang boehate
Koen maksud adoe, jak hukom cut bang
Bak keuadaan, hana mungke lee
Kuliah golom beh, meuhi that sayang
Dua thon silam, kanda neu pikee
Kon adoe tipu, gaseh ngon sayang
Meuhuet that badan, loen jak duk juree
Tapi mandum nyan, bukon paksaan
Hanya kiasan, peumikat hate
Loen neuk eu kanda, serius pue tan
Beudeuh lam angan, intan meu ble ble
Meunan lam haba, jibie balasan
Seuolah gampang, hana di pikee
Bungong mangat bee, lisi bak karang
Ka dusta lisan, ngoe cut bang kadee
Wahee eo kawoem, sigeunap taulan
Pesta bak rakan, hana jadeh le
Golom meunikah, batal tunangan
Gaseh lam angan, putoh keulikee
Rupajih laeh, saboh pinangan
Putri kayangan, ka dusta hate
Leubeh goet tanyoe, hai adoe sayang
Lam perpisahan, bek meurumpok le
Hancoe lam hate, luka loen peundam
Seudeh loen simpan, saket bukon lee
Mungken nyoe takdir, keuheundak tuhan
Dalam hubangan, tanyoe geupeu cree
Sidumna saket, hate loen tuan
Seupre loen sulam, hana meunyum le
Dusta di adoe, ban mata parang
Meunan tamselan, loen boh lam Syah e
Sekian dile, rite karangan
Bak laen teuman, sambong keulaye
Meunyoe na kata, seugak lam irang
Meuah loen tuan, baten ngon lahee
Posting Komentar