Laksana leunggah, bak kisah jampoek
Rame geu tawoek, leuhoek ka padra
Kadang jie meucang, ban huet hana troek
Mandum jie tumboek, hana jie kira
Salamalaikom, wareh lam geuboek
Uloen nyoe ka troek, jak saweu gata
Haba seukada, keunoe loen taroek
Meuheut loen antoek, si jaloek sastra
Kinayah awai, peuneusan datoek
Asoe jieh sep lhoek, soe juet boh makna
Contoh lam mariet, Seu'it hai budoek
Jinoe uloen roek, lam seung seudana
Hayeu that tupee, meuen di pucoek
Meusang han ladoek, jatoeh u donya
Bak teuka badee, angen poet bioek
Langsong meutumpoek, jaloek seulanga
Hudep Bek sombong, hai Burong Jampoek
Kana Keutoktoek, yang mat Wedana
Jeh rajawali, peutimang tampoek
Maklumat di joek, bak leuk baguna
Tanyoe umpama, seuleu'a tumpoek
Hanjuet pieh ka broek, ujuen peuseuma
Hudep lam donya, waheu teungku o'ek
Bek roh ta raboek, racon ngon hama
Sayang aneuk trie, lam ie ka maboek
Racon saboh ploek, meuhie seu tima
Bak balee jaga, mariet geu rumboek
Peugah peu yang broek, keu wareh dumna
Bak sang ka lageum, nafsu hana troek
Mandum geu peubroek, urueng ubena
Hana geu teupue, dosya that rayoek
Ka sapue anggoek, mandum ka sama
Hai meundang ijoe, si kurue datoek
Ingat rakan o'ek, keu umue donya
Bek keulam hate, itam ban reudoek
Sayang apa yoek, soe kaloen hana
Singoh oh saket, tuboh ka lapoek
Meusoe ta tawoek, jie pakoe hana
Baroe ta rasa, teu moe meu soek-soek
Akai tanyoe broek, masa lam donya.
Pena Kinet BE
Posting Komentar