Jie ek ie raya, di dalam Nanggroe
Hanyoet meuligoe, rakyat binasa
Salah bak meu lhuk, paruk ka bucoe
Sayang rakan droe, kabeh keucewa
Hai banta seudang, sayang samlako
Kadeuh meupaloe, aceh lam bala
Bak teulah sithon, di ureung meugoe
Teulah si uroe, urueng meu rusa
Keutapong jabet, hudep ka jipoe
Hana le jiwoe, jak saweu gata
Meutan le tatung, leumung bansa droe
Oh ka deuh rugoe, baroe meurasa
Wate na intan, ta reupah busoe
Hana ta hiroe, ta jaga kada
Ban kana laen, seunalen gantoe
Keu aneuk cucoe, bagah ta lupa
Neu haroek tempe, sure neu publoe
Timphan meu asoe, neujok keu jawa
Ban jinoe leupah, geutanyoe rugoe
Meupat geunantoe, ta gadee laba
Dak lagee jameun, ta peusaboh droe
Aceh han kachoe, lagee nyoe rupa
Bak picrok pangkat, keu prut sabe troe
ie ka jie pasoe, lam luboe gata
Seulayang jie ek, ka lindek taloe
Tingoh coet uroe, angen poet teuga
Bak donya luwa, han ta juet peutoe
Kareuna bangai droe, bak ta keulola
Jampreuk ka bicah, meuruwah maloe
Seukei lam uroe, ka layoeh rupa
Tika neu manyum, keusoe neu puwoe
Kabeh meu gantoe, ngon kasoe luwa
Pajan adak juet, ta peu saboh droe
Ta pakat adoe, keunoe yue gisa
Maruwah aceh, hana soe gantoe
Meunyoe kon adoe, but awak gata
Pike bek lanja, meunyeusai dudoe
Salah bak meuproe, teuka juet dawa
Bak gara-gara, karu sabe droe
Asee di cakoe, uleh jakarta
Han ek ta pike, akhe meu paloe
Mandum salah droe, bak reubot tahta
Andai biet leupi, meu adun adoe
Han karu nanggroe, ngon propaganda
Seukian dile, si baet rampoe
Neu peunyum keudroe, meupat na cupa
Silawet kisah, dalam hareutoe
Keu suai rugoe, darah di bansa.
Jinoe ka leumah, ta kaloen keudroe
Kiban keuh rugoe, syahid dum Bangsa
Ka dua blah thon, nibak jaroe droe
Han ta hiroe, lagee ban cita
Janda meu ranggong, meutan soe pakoe
Meutan le lakoe, hana meuhoe ka
Di aneuk yatim, jie moe tiep uroe
Jirat ta meuhoe, jasat ayah nda
Yang duk lam kantoe, seunang han bagoe
Kabeh dum laloe, deungon rupia
Rakyat lam gampong, hudep lam bakoe
Sabe deuk-deuk troe, hana soe kira
Wahee eo bapak, peumimpin kamoe
Tulong neu hiroe, Rakyat jeulata
Bek ban ka mangat, dalam meuligoe
Neu lupa kamoe, Rakyat yang papa
Sidumna seudeh, teu cureh asoe
Ayah kamoe nyoe, ta troh geu gisa
Bak bela bangsa, yoh saboh uroe
Hingga tan geuwoe, jak saweu desa
Meupat keuh irang, jampang loen peutoe
Lake bantu droe, mangat seujahtra
Sedangkan kamoe, jalan tan meuhoe
Seusat meu keudroe, paneuk sikula.
Pena kinet BE
Posting Komentar