Ladat bak si cho'e, ka dua bagoe
Meunan hareutoe, peutuah Maja
Bak reupah neuduk, seuluk Meuligoe
Jinoe sabe droe, ka jie meudawa.
Hai jampang meuleuk, saleuk samlakoe
Pakoen lage nyoe, jinoe ta rasa
Bak salah parang, ka patah Jatoe
Salah keumudoe, rakyat binasa.
Meupat keuh neuduk, Aceh lhe sagoe
Lage Hareutoe, lam Hadieh Maja
Sampe lage nyoe, ka ruyang-rayoe
Tan deuh meusidroe, nyang troh jak bela.
Pakon geutanyoe, tan ta Turie Droe
Kabeh dum laloe, bak rupah tahta
Pakon juet karue, Adun ngon Adoe
Bak reupah Asoe, Bungkoeh Rupia.
Urueng Aceh Nyoe, pakon ka meunoe
Sabe keudroe-droe, ka jie meudawa
Ban tingoh reumbang, ta peugoet Nanggroe
Urueng geutanyoe, kabeh lam subra.
Wahe wareh lon, Adun ngon Adoe
Pakoen lage nyoe, naseb di Bangsa
Jayeh sileupah, geutanyoe rugoe
Adun ngon Adoe, pake han bla-bla.
Nyoe salah jalan, gisa adun droe
Riwang loem tawoe, lage seumula
Meupat yang tireh, sama tanyoe doe
Aceh Lhe Sagoe, geutanyoe puga.
Ta gampoeh beunueng, meupalet jaroe
Meugampoeh taloe, tawoe bak punca
Keudeh bak asai, bek ta peutuwoe
Cok pulang Nanggroe, bak jaroe Jawa.
Pajan Meurdeka, Aceh lhe sagoe
Meunyoe sabe droe, larot lam dawa
Ka teulah sithoen, di ureung meugoe
Teulah si uroe, ureung meu-Rusa.
Meunan teujadi, dali uroe nyoe
Geu kheundak le poe, Allah Ta'ala
Nyoe keuh cobaan, keu urueng laloe
Hingga ka tuwoe, keu Nasib Bangsa.
Ta cie sadari, dumna ka rugoe
Dumna meupaloe, Aceh lon cinta
Karap lhe blah thon, ka tamat keudroe
Mantong meucawoe, tan meuhoe Punca.
Ladat keuh tahta, neuduk Meuligoe
Harap Pendopo, geu neuk duk raja
Ban ka leumah Meueh, Apam ngon tumpoe
Rakyat lam Nanggroe, bak sang ka lupa.
Acie neu pike, pakon lage nyoe
Aceh uroe nyoe, dalam seungsara
Meusoe keuh salah, wahe eo adoe
Pue salah Meuntroe, Pue salah Raja?
Hingga teucurah, reusam han sampoe
Hukoem tan meuhoe, leumah tan tanda
Jameun meudelat, Nanggroe Geutanyoe
Pakoen keuh jinoe, ka meunoe kada.
Andai ta teupue, Dudoe lage Nyoe
Han mungken tanyoe, takoeh seunjata
Adak pieh syahid, Mulia lakoe
Bak Bela Nanggroe, jie keunang jasa.
Teutapi jinoe, ka laen bagoe
Tan ta turi droe, nyoe biek mulia
Bak gara-gara, meuheut keu moto
Harga diri droe, ka ta peugala.
Jijok jabatan, jiyue mat Nanggroe
Jisak bak jaroe, deungon Rupia
Janji Helsinky, Tinggai tan meuhoe
Meutan soe pakoe, Meutan soe bila.
Wahee eo Teungku, Raja ngon Meuntroe
Neu tulong kamoe, Rakyat Jeulata
Ubena janji, neu peu seuleusoe
Supaya kamoe, Hudep Seujahtera.
Pena Kinet BE
Posting Komentar