Pawang Jaloe bruek buhuek lam bakat (Riyeuk)
Seubab patah drat gagang keumudoe
Neujak u laot, neu tanda darat
Saweub meuseubab bek sisat meuwoe
Nanggroe Aceh nyoe jithe ka Hebat
Seubab ka leungkap neuduk Meuligoe
Bak ce'u di timu, Geubang ngon Langkat
Siblah roet barat, gunong meutaloe
Seulawah dara teudong ka teugap
Sipasang teupat meusang ngon lakoe
Seulawah Agam teudong gagah that
Bakhi seuneusap keu labang Nanggroe
Lheuh nyan Guerutee jithe leumpah that
Seunaloeng jagat keulileng puloe
Gunong Geureudong ban bubong atap
Kulu coet seubat jie lintah moto
Wahee rakan lon wareh ngon sahbat
Aceh nyoe hebat Wahe eo adoe
Ta papah pudi ta jaga riwat
Saban ta rawat hai asoe Nanggroe
Keurajeun jameun Aceh meudelat
Sewueb meuseubab Raja di Nanggroe
Pemimpin Ade bijak ngon teupat
Areh lagak that taat jih keu Poe (Allah)
Lon tiek haba nyan di sinan siat
Jinoe lon liwat kisah saah nyoe
Ka meuribe thon jaloh tan meupat
Nanggroe meudeulat kabeh meucawoe
Seulama raja ka gadoh mandat
Aleh meuseubab taloe bak meubloe
Aceh ka reule hana le hebat
Sampoe inohat ka meuchokoloe
Ka meuribe thon neu keubah teumpat
Ka neujok mandat bak aneuk cuco
Neu keubah qanun reusam ngon adat
Neu keubah tungkat keu lamat Nanggroe
Jie urueung awai ta tukri hebat
Donya ka jicap sampo'an jinoe
Teuma geutanyoe eu rakan sahbat
Peukeuh seuneusab karu sabe droe?
Tamong lam kisah jinoe lon rambat
Teuntang hai kalap raja di Nanggroe
Nan jih gop nyan meuleumpah mantap
Raja Puntong wahe rakan droe
Si Raja Puntong urueung yang teupat
Lagi ngon hebat gagah han bagoe
Bak saboh masa gop nyan di tangkap
Jie tudoh teupat pajoh peng Nanggroe
Ureueng jih areh lagi ngon taat
Jie sayang meuhat uleh rakyat droe
Saah nyan makmu timu ngon barat
Mandum ka seungap ban rata sagoe
Ohban lheuh jidrop Raja di seukap
Peunulang pangkat laen geulantoe
Neucok waki droe neuyu mat mandat
Ka neu-peuharap peutimang Nanggroe
Waki pieh leupi hanyi ban Seupat
Meunan eo sahbat leumah deuh bagoe
Urueung jih seu'it leumah that teupat
Sang-sang butoi that ta kalon keudroe
Di Raja Puntong ka-lam seureukap
Gop nyan di seukap jioh han bagoe
Bak waki geujok macam dum pangkat
Yue atoe meuhat rakyat lam Nanggroe
Di teungku waki tukri seunang that
Jinoe glah hajat geunak mat Nanggroe
Dalam Meuligoe geu loncat-loncat
Kaoi ngon hajat pieh ka meusampoe
Karap meuploh thon masa ka lewat
Bala troh meuhat keunan u Nanggroe
Rakyat dum susah timu ngon barat
Hanjeut geu hareukat keu aneuk cucoe
Rakyat dum susah larot lam ratap
Di Waki Seupat sabe neu$im droe
Neujok ngon pade neuyu peusapat
Nibak peujabat dalam Peundopoe
Neuhoi ngon Nujum neuyu meuhadap
Neuyue meusapat dalam Meuligoe
Waki ka geuduk leuhu di teumpat
Katroh meuhadap nujum tujoh droe
Di ahli nujum ka geu meulimbat
Ka geulop kitab geu-eu bala nyoe
Sibok di waki neuhoi peujabat
Neuyu meusapat jak eu rakyat droe
Cuba jue keunoe sigra meuhadap
Tulong peusapat man tujoh Meuntroe
Di Lem Haria lajue beurangkat
Jijak jok surat keupada Meuntroe
Meuntroe pih katroh kaneu meurapat
Ka geu meuhadap nibak waki droe
Peuna Paduka neuyu meusapat
Neu peugah leugat jinoe bak kamoe?
Meunoe hai Meuntroe ta dingoe beurap
Lon sa'h sigoe sa'p agenda tanyoe
Ta nging leh siat saudagar hebat
Tacie peusapat dalam Meuligoe
Meuntroe ka geutron laju beurangkat
Kupiah geulhat nibak ule droe
Ladom sok peci ngon baje reumbat
Ladom eo sahbat jubah nibak dhoe
Ka dua uroe Meuntroe beurangkat
Neuba ngon surat neumat bak jaroe
Na sidroe sideh suadagar hebat
Kaya leumpah that rap saboh Nanggroe
Meulheuh si minggu ban katroh hajat
Neu peugot rapat Waki Peundopo
Katroh di sinan mandum peujabat
Jak meuwufaqat untuk rakyat droe
Toke Saudagar neu buka kitab
Neu seubot meuhat harga barang droe
Neucok sinaleh yum si rambat
Neucok si gambat ta hitong kilo
Meunyoe jai neucok hai pak peujabat
Lon pulang meuhat fee keu urueung droe
Yum pieh ka murah barang lagak that
Han saket rakyat oh geu pajoh nyoe
Meunoe hai Toke bek neupike that
Makanan rakyat bek that neu pakoe
Adak pih barang thon jih ka lewat
Hana meuseubab teutap kamoe bloe
Nyang peunteng toke meuphom siasat
Beuta teume a'p teuh bacut sapoe
Nibak laporan harga ta lipat
Beuna syufa'at meusaboh moto
O'hka putoh yum ka meudum limbat
Toke woe meuhat dari Meuligoe
Beudoh Lem Haria lajue beurangkat
Haba geu intat keu waki Nanggroe
Duhi tuanku Waki nyang Hormat
Lon peugah leugat info uroe nyoe
Kalheuh putoh yum bantuan rakyat
Na syiet syufa'at bacut keu tanyoe
Oh ban geu dingoe info nyang mangat
Waki Nanggroe a'p seunang that bagoe
Geukali untong loe that deuh rahmat
Rakyat meularat hana geu pakoe
Meunan lah kisah haba lam liwat
Kisah jameun that ulon hareutoe
Keu saboh teumpat Nanggroe sare'ap
Pemimpin dum taat munafek tuloe.
Bireuen, thon jim.
Kinet BE
Posting Komentar