Judul: Ban Laku Linggang
Peunuleh: Adam Zainal
Ban linggong lusoh, meu daloh pinggang
Seusuai linggang, tangui bak tuboh
Yang kon ata droe, bek tanyoe reupang
Binasa badan, sahoe pieh han roeh
Meunan peutuah, bak meurah intan
Dilee saboh jan, geutik lam ratoh
Hai tungkai bana, si bangsa pawang
Dingoe peuneusan, bak sinyak sungkoh
Salam alaikom, wareh poe rangkang
Izin loen tuan, keunoe loen piyoh
Si bayet ritee, loen seutee karang
Meupat yang irang, meubek neu paroh
Meurdu dalam gle, meusu kutilang
Di pansi kawan, si aneuk puyoh
Neu anggap laju, poe buhu sawan
Lam grup bangsawan, ji jak tot suloh
Yang kon peurangui, bek ngui bak badan
Bek gop boh pangkai, laba ta pajoh
Tasoek ban laku, leuwue pakaian
Bek asai asai, ta sak pue yang roeh
Meunan nibak bu, seudu ta timang
Ban leumah leumang, mandum ta pajoh
Bek ban ka leumah, asoe lam pingan
Karoh meukunyan, ra racon tikoh
Kiban ta turie, tukri paki ban
Kadang lam talam, racon ka diboh
Nyoe tan ta jaga, adap ngon sopan
Tiep uroe tuhan, tanyoe pajoh broh
Oh wate tajak, seugak bak jalan
Ta peu seusuai, ban laku kawoh
Ubee loet langkah, ta peupah irang
Seulamat badan, hana asee groh
Meunan lah bagoe, asoe karangan
Bak urueng awam, yang badan kuroh
Peuneusan nek tu, mantong teu simpan
Loen tiek si gumpai, keu rakan jioh
Meunyoe na tutoe, pudoe han simban
Meuah loen tuan, wahee rakan beoh
Dalam meu panton, uloen goh reumbang
Nibak mulaan, loen salah huroh
Aneuk keunari, di cong bak seuntang
Jipoe sikawan, ateuh bak iboh
Seukian dile, hai gure garang
Syah e si gumpai, keunoe uloen boh
Bicah angen gle, saree geulumbang
Arongan pantai, mantong geumuroh
Ujeun pih jitoh, hana jie pirang
Paseung ie malam, pih golom teudoh
Kasep nyoe dilee, loen sente lawan
Bak laen kesempatan, akan loen piyoh
Akhe nibak buet, loen top wassalam
Keu mandum rakan, yang na di lampoh.
Posting Komentar