Judul: Beu'oe Seu'it
Peunuleh: Adam Zainal
Si gantang Gayo, peu bloe u Bireuen
Tuka ngon uUdueng, si kilo bileh
Salam alaikom, keu mandum urueng
Yang na lam janguen, sinoe ngon sideh
Hai seugak hawa, ta puga utuen
Ta pula bayeun, ngon rumpun bugeh
Andai biet jeumot, gigeh peukateun
Ciedah peurangui, ban asoe manggeh
Kiban ta paban, reumban ta tunyum
Rimba han tatung, watee uroe jeh
Bak ka troh jawa, keunoe meukumun
Jeuhuet ta linteung, tajak peu abeh
Sapeh ceumpeudak, ilak lam rukung
Ban ka gop magun, campli tajak peh
Sayang poe banta, di dalam lumung
Hana soe sunyung, meu si krek kuweh
Riyeuk di pante, indah ngon paseung
Buih meu sareng, bak jaloe tireh
Andai biet langet, tan reudok linteung
Kiban keuh jangeun, pade di sideh..?
Wahee eo rakan, syedara mandum
Dingoe loen umum, haba yang seudeh
Meusoe keuh salah, dilee tadoe lueng
Hingga teumbayuen, nihuen ngon ampeh
Bak hana salah, peutuah jameun
Urueng tuha khuen, wate uroe jeh
Kabeh teudong dong, buya dalam krung
Yang cok meueh karun, urueng Portugeh
Maka dari nyan, beu sadar adun
Luwah meulinteng, utuen meu bareh
Andai biet tatem, tajak meu keubun
Makmu teuh mandum, hudep han peudeh
Meunan lah miseu, haba loen sunyung
Meuah neu maklum, nyoe teupeh gateh
Koen loen seungaja, di dalam lamun
Seudari mandum, hitam ngon puteh
Silayang jipoe, ateuh gle meundung
Ka putoh beuneung, meu cangik tapeh
Seukian dile, kisah uloen leung
Di dalam mideun, ka uloen tuleh
Pakon pemuda, Rame meulamun
Ka jie tumpang keung, lam sagoe binteh
Meutan keurija, seungga lam keu jrun
Han meupu lamun, gadoh bak jie eh
Salamalaikom, keu mandum urueng
Ganteng ngon Caheung, tumbon ngon lipeh
Ka loen akhiri, si puti janguen
Harap neu maklum, nyoe salah tindeh
Posting Komentar