Judul: Filosofi Jeungki
Peunuleh: Lisa Ulfa
Salam'alaikom ampon di keudah
Saleum sipatah dilee ulon bri
Sigo meujamak keu mak ngon Ayah
Bandum sahabah wareh fans seni
Awwalul kalam ucap bismillah
Taharap berkah bak po teuh Rabbi
Sipucok karang ka trang lam madah
Semoga Allah beu neurestui
Nanggroe Nyang makmu meutabu kisah
Seuramoe meukah julukan geubri
Jitheè u luwa bangsa Nyang gagah
Adat meuruwah tanöh srikandi
Jeumpa, Seulanga, Rincoeng meutuwah
Tarian ceudah, Saman, seudati
Hikayat Aceh ngon Hadis madjah
Indatu keubah beuna ta turi
Likoet nibak nyan lon cuba surah
Saboh peukakah geupeunan jeungki
Warisan nanggroe nyang karap punah
Rata daerah tan soe padoli
Ph'am keuph'am keuph'um, aleè jipeutah
Leusoeng han bicah badan meunari
Nyang duek bak lusoeng, teupoeng geupapah
Meusoe nyang gagah peuayoen gaki
Ph'am keuph'am keuph'um, p'am p'um su bicah
Aleè jipeutah, 'Aat-'iit su jeungki
Seulaen alat nyang meufaedah
Disinan leumah nilai rohani
Pakiban muphom lon suson jeulah
Yang töeh keuh hikmah loen ci peuturi
"Meulatih saba, meubek geugabah
Peutheun Amarah, Nyan filosofi"
Makna kedua syahra meutuwah
Teujalen kisah lageè kheun Nabi
Umat lam kompak tapak si arah
Hana meupisah kaya ngon faki
Hana meubeda teutangga siblah
Pilah meupilah hantom terjadi
Tulong-teumulong tanggong musibah
Tamse sidarah lam tuboh ummi
Lam jeub-jeub gampoeng rukoen sileumpah
Saban tueng susah nyang buet beu jadi
Geumeuduek pakat oeh na masalah
Geumusyawarah mita solusi
Le that ka gadoeh reuloeh ngon patah
Laen peukakah nyang cok posisi
Si jeungki Aceh keudeh geukubah
Dalam seujarah budaya lawi
Meunan chit gadoeh reuloeh dum marwah
Aneuk ngoen ayah saleng membenci
Kumuen ngon apa muka tan ramah
Kaya ngon susah hudep ka napsi
Segala pujoe puwoe keu Allah
Keudeh ta seurah nibak ilahi
Semoga aceh sabe lam fitrah
Bek pecah belah ban buet yahudi
Kasep meumada haba sipatah
Meupat nyang salah meuah beu neubi
Kadang na kureung ateung kureung pah
Makluh hai sahbah baro lon uji
..............
Posting Komentar