Judul: Muda Ban Rayoek
Oleh: Adam Zainal
Ceungkeh di jaboi, bungkok u banda
meuramphak laya, gantoe oe'n pucoek
donya ka akhee, loe that peu tanda
Lam pesta pora, muda ban rayoek
Alah hai kuntom, tawoe silala
geulima muda, siyoek u guboek
peuran urueng syiek, leupah that raya
Aneuk neu jaga, bek sampee maboek
Meunyoe ka luroeh, keumbee dahlia
Tan le meu harga, kuweh dalam ploek
Hana le soe tung, meu tan soe hawa
ka gadoeh rasa, ka meu seurueboek
beuna neu joek beut, canden nyak dara
Bek bak sikula, keudeh neujak joek
ideologi reusam, Donya seumata
jioeh that beda, wahee ayah oe'k
han pue na sadoeng, keu Bidan Desa
Oh di jak sikula, di caboet u lhoek
Jinoe ka ramee, ngon pasie Jangka
Meu lumpah gura, oeh ta eu tumpoek
Aneuk yang agam, beu goet neu aja
Bek sampee lanja, laloe lam guboek
Nyoe ka di turi, sabu ngon ganja
Abeh dum harta, suah neu doe lhoek
Pue loem yang tingoeh, keu neuk dewasa
Teuga that gaya, wahei rakan oe'k
kadang bak jaroe, na honda raya
Meu lumpah subra, si uroe suntoek
Wahei rakan loen, kawoem si bansa
bukoen lam haba, maksud loen peu broek
Cuma masukan, si Untai kata
Aceh mulia, bek patah tampoek
Beu goet neu papah, si ayeum mata
oh watei tuha, kiblat jie tawoek
Gata di jaga, di balah jasa
Hana durhaka, wahei apa yoek
Bek that neu peu lhueh, putik bungong la
Bambang di lua, hana meupat troek
Hama dum jimee, virus di kota
Sayang lam Desa, teuka bungong broek
Jinoe ka leumah, ka ta eu nyata
Kiban dum gura, sinyak ban rayoek
Umue tujoeh blah, lakoe ka dua
Meusoe yang kira, bawang ngon ladoek
Bak gara gara, jie meuen cinta
Mantong SMA , ka jie buka ploek
Watei ka mumee, oh pruet ka raya
di sinyak dara, jie kliek meu soek soek
watee kandungan, troek buluen tuha
si ayeum mata, jiboeh dalam lhoek
Padahai that suci, bayi balita
jie tiek lam paya, le dara budoek
Ayah jieh hana, jie plung meutaga
Lhueh kubah noda, ka di coek andoek
Yang tanggong male, ayah ngon bunda
Seu umue masa, kurue tueh ka broek
Seugolom peu buet, pike hai dara
Oeh wate cupa, hana soe anggoek
meuka di bak bue'ut, bek jioeh gata
Ngat na soe jaga, hai bungong leupoek
Oeh noe keuh dilee, rite seupada
Nasehat loen ba, anuek ban rayoek
Kadang lam fasah, sajak meutuka
Mohon saudara, peu butoi bioek
Meuah loen lake, nibak peumbaca
Kadang na gasa, haba loen raboek
Meunyoe na sajak, jeuhuet lam bahsa
Neu teugor sigra, komen neu taroek
Posting Komentar