Lat jeuneh benda, dum kabeh buluet
Lageum bak taduk, ta gusuk dada
Angen keulua, pieh kabeh teusuet
Haba nasehat, bacut uloen ba
Keupada gata, rayoek ngon ubuet
Wahee adek cut, leumbut bungong la
Sudi ta baca, haba uloen ruet
Salam alaikom, rakan syehdara
Katroh loen teuka, meujak peujok buet
Sanggop han sanggop, pulang bak gata
Adoe neu jaga, mangat bek jeuhuet
Oh uroe tajok, leuhok sikula
Malam pih beuna, tayue jak bak be'uet
Mangat jih paban, jie teuoh beda
Bek roh meulangga, wate jie peubuet
Seumeulhoh uroe, mirah ka sinja
Bintang keujora, ka leumah di bluet
Peutanda donya, malam pih teuka
Ban singgak mata, meutuka juruet
Ban suleng bulueh, suloeh suara
Di dalam rimba, sideh geu tiyuet
Meunan lah miseu, nasehat rika
Keunoe lam maya, uloen peuratuet
Leuksana linggeh, meu tindeh bata
Ladat meu beda, wahee eo yah cut
Bak seureng seureng, laloe ngon gamba
Gadoh etika, bak sinyak ubuet
Puloem jameun nyoe, meu leumpah gura
Ka canggeh masa, leumah yang pijuet
Kadang bak hape, deuh jahee gamba
Lalee aneuk nda, ngon Gem teusebuet
Bukoen le sayang, keutapang muda
Laloe tip masa, bak pike keu pruet
Hingga yang wajep, sudep geu lupa
Lak loek keurija, bak peuturot huet
Andai biet jayeh, ajai pih teuka
Meu sapue harta, hana ta jake'uet
Meupue ta jaweub, oh malaikat ba
Singoh le gata, wate geu sikre'uet
Akai jut makjuet, leuhut pih bek na
Iman teuh beuna, adak pih ubuet
Bek that ta picrok, ta haroek donya
Mandum nyoe fana, sang ubee pale'uet
Kiban loen ratuet, ka loen suet haba
Nyoe teupeh gata, meubek neu caruet
Meuah keu uloen, yang mantong muda
Silah seu heunta, meurunoe beu juet
Meu bagoe sifuet, jeuhuet manusia
Uloen pih sama, paleh meu jeuhuet
Akan diri loen, lahoen bak jaga
Bek roh lam jiwa, kawoem nabi lut
Seukian dile, si gadee laya
Ka abeh sewa, jatah bale be'uet
Jinoe loen pulang, keu urueng gata
Ka loen jak gisa, keudeh u garut
Posting Komentar