Judul: Nanggroe Lam Damee
Peunuleh: Adam Zainal
Reudok di aceh, ujuen u padang
Bicah geulumbang, u puloe jawa
Sayang bansa loen, teu seureh pandang
Lagee ilalang, di dalam rimba
Langet yang ceurah, hana meu bayang
Urueng meu ladang, hana shok sangka
Nanggroe lam damee, makmu hana ban
Hoe yang ta padan, tuboh teu heunta
Yang di bineh gle, beudoh meuladang
Pukat jak reuntang, jak laboh kadra
Geutanyoe aceh, hudep bek bimbang
Lake bak tuhan, mita seujahtra
Ta syukoe kayem, geu tanyoe insan
Rahmat bak tuhan, meulumpah raya
Meu bek teukaboe, lam keubatilan
Meunyesal badan, oh wate tuha
Meu leumpah luhu, sulu bak sintang
Ceudah sumantang, lam taman raja
Meu bek le karu, seusama rakan
Sama ta paban, dame ta jaga
Rindu lam hate, rande pahlawan
Wajeb hai taulan, ta keunang jasa
Meu bek teusireh, hate di dalam
Wareh ta sayang, seureng seumapa
Hai jak loen dodi, buju oe'n peundang
Angen seulatan, jie poet sep teuga
Tanyoe yang meugo, pade dalam blang
Awak di seubrang, yang pajoh laba
Sayang keu aceh, bumoe iseulam
Dalam cobaan, ALLAH neu coba
Beu tabah hate, hai bungong lawang
Lam kejayaan, geutanyoe rasa
Aneuk cempala, jipoe meu kawan
Ateuh bak mamplam, meu suka ria
Wahee bansa loen, bijeh peujuang
Seusama rakan, bek ta meu dawa
Bek dawa dawi, ngon salah faham
Meupat yang reumbang, sama ta puga
Aceh beu makmu, nanggroe bek le prang
Sayang hai abang, rakyat lam desa
Rakyat jeulata, yang juet keu korban
Meunyoe teuka prang, tanoh aulia
Ka lhueh ta kalon, wate saboh jan
Bansa loen sayang, jipoeh di siksa
Tualang bayuen, meu jruen ka garang
Tan le soe geu dham, utuen lam rimba
Kaye dum ijoe, indah ta pandang
Tanda syukuran, keu tuhan Esa
Mandum lat batat, leumah ka girang
Seunang leumpah ban, ta kaloen nyata
Seumenjak dame, nanggroe tan le prang
Ta cari makan, tan le keundala
Tan le di aceh, jiba aturan
Hana le soe tham, hoe yang ta teuka
Meu tan le na deuh, razia bak jalan
Kuasa bak tuhan, han ek soe sangga
Lewat syah i nyoe, loen tuleh pesan
Keu mandum rakan, wareh si bansa
Kadang na haba, yang hana padan
Neu tugor rijang, dalam komenta
Beudoh wareh loen, hamdai ngon taulan
Hai muda seudang, beudoh beu sigra
Nanggroe ta jaga, aceh ta sayang
Bek leupah lawan, ji jak meu cuca
Bek na lam hate, sifeut musuhan
Seusama insan, beu rumeh muka
Sindee meunyide, bek ta keudepan
Oh teupeh badan, leubeh bak luka
Wahee rakan loen, inong ngon agam
Meuah loen tuan, meunyoe na desya
Lewat panton nyoe, loen tuleh karang
Gantoe hiburan, lam donya maya
Sekian dilee, si bareh peusan
Peu ingat badan, wareh loen cinta
Bak ujong haba, loen toep wassalam
Keupada rakan, wareeh mulia
Dengoe sibujue, leuhu beu reumbang
Nyankeuh peuneusan, bak loen yang muda
Ingat beu kayem, dum keujadian
Seujarah silam, bek tanyoe lupa.
Posting Komentar