Canden Bungong piek, ka reuhik rupa
Keumang Dahlia, hana le wangi
Bak gara gara, ikot pilkada
Seusama bangsa, ka ta meu benci
Angen di timu, saloh tenggara
Meu gantoe masa, ka tinggai semi
Di megawati, sanang that raya
Aceh loen cinta, ek di kendali
Bak gara gara, meurubot tahta
Lamit ta puga, tajok kurusi
Hingga ka tuwoe, pue yang ta rasa
Lhueh seuh prang raya, dengon tsunami
Laot keu saksi, rimba peunyata
ALLAH jok bala, bumoe seurambi
Zalem di rakyat, zalem di raja
Ka meunan qadha, keuheundak rabbi
Wahee bangsa loen, kuru Aulia
Beuna ta jaga, fih'e bak Wali
Seujarah dile, bek gata lupa
Bek dengon jawa, jak balah budi
Jameun soekarno, ka lhueh ta rasa
Leumoh suara, teubit bak bibi
Ikrar lamteh, jayeh loem kada
Aceh di dusta, meunan deuh dali
Gantoe presiden, bak jameun ORBA
lheuh di Kudeta, yah Megawati
Ji duk suharto, wate nyan raja
Leumah anggota, Lahee PKI
ulama Aceh, loe that ji siksa
Aceh loen cinta, ji tem nodai
Aqidah Aceh, abeh di ceula
Jipoeh dum bangsa, aceh seurambi
Lhueh nyan guseudur, yang mat kuasa
Aceh lam duka, tan soe akhiri
Sampee Habibi, tan deuh meu haba
Jeut di kudeta, le Megawati
Yoh saboh uroe, di kuta radja
Di cut nyak mega, seudih han sakri
Bak rakyat aceh, meu janji buta
Nyoe loen duk raja, hana pue sanksi
Meu biok darah, han le kelua
Aceh loen cinta, seupunoh hati
Meunan lah janji, di cut nyak mega
Hingga terpana, umi ngon abi
Ban ka sah meunang, jiduk keu raja
Janji di banda, ka di ingkari
Ji jok keu Aceh, bala tentara
Ji sah DOM raya, tamah TNI
Malam seulanyan, meu bek neu lupa
Darurat jiba, le Megawati
Tanggai 19, ingat hai bangsa
Seujarah lara, seudeh han sakri
Jameun SBY, jayeh loem gura
Lam hura hara, aceh lhe seugi
Teuntra ji ruah, keunoe dum jiba
Akhe teutanda, damee Helsinky
Meu seubab Damee, ALLAH bie bala
Lheuh teuka geumpa, ji ek tsunami
Hikeumat damee, neu tulong jaga
Bek sampe cupa, tan ta syukuri
Oh lhueh nyan lahee, poin Peukara
Pasca teu tanda, Damee ngon RI
dalam MOU, gue tuleh tinta
Dum donya luwa, ji dong keu saksi
Jinoe ka tuwoe, wareh di bangsa
Wap gara gara, meu pajoh janji
Hingga teu seuheh, lae'h dum kata
wap gara gara, di provokasi
Hingga sabe droe, teuka juet dawa
Leumah ka cupa, tan hareuga diri
Bak peu thuen ide, hina meu cela
Woe bak seumula, dukung PDI
acie neu cep cep, neu timang rasa
Tan le hareuga, bumoe seurambi
Bak gara gara, peungaroh jawa
Neu tumbal Bangsa, demi kurusi
Andai geu tanyoe, saban ta heunta
Ban lagee yang ka, lam saboh misi
Sunggoh aceh nyoe, ka troh merdeka
Meunyoe di bangsa, tan wara wari
Seukian dile, si baet haba
Meuah loen pinta, bak abi abi
Kadang na silap, bak loen meu rika
Harap syedara, beu neu maklumi.
Pena Kinet Be
Posting Komentar