Lakon si bajoe, meureuboe beukah
Mita peunayah, saleeh yang haleu
Adak lam ujuen, dalam uroe crah
Beurkat rafaqah, si gumpai taku
Hudep bek leusoh, suloeh lam cirah
Meu biet that susah, bek urueng teupu
Tuhan hazarad, wajep ta seumbah
Yang maha luah, si geunap makmu
Salam alaikom, kawoem meutuah
Izin loen curah, si lisan buhu
Kadang loen meusu, leugu han jeulah
Siduep nan tingkah, neu baca laju
Ban reudam uroe, oh seupoet indah
Meu jingga mirah, seulapeh biru
Ujoe hareutoe, puwoe meunalah
Calitra ciedah, peutuah Nek Tu
Allah aneuk oe, seudeh hate yah
Han meupat peugah, wate grah taku
Demi keu aneuk, meu tem meu sosah
Beu glah kuliah, beu juet keu guru
Sayang pucok bi, tuwii ka reubah
Tanoh ateung crah, hana soe sibu
Ban demi gata, aneuk meutuah
Rila di ayah, walau jak ek u
Engkoet yang tabeu, saleu ta papah
Lam paya luah, ka ayah jak jeu
Demi teumon bu, ngon limoen mirah
Sabe lam tabah, ayah soem bisu
Oeh ban ka rayoek, anuek meutuah
Kabeh kuliah, di indra makmu
Kana keurija, lam geudong meugah
Gata bek cungkah, hai rimbon meulu
Ingat keuh jasa, poma ngon ayah
Meu susah payah, gata geubi bu
Kahek geu bantu, dalam peunayah
Demi maruwah, gata beu maju
Wahee oe anuek, reule ka beukah
ie mata darah, meulinang baku
Oh ban di aneuk, hudep ka mewah
Gaseh si leu'ah, ka gata teupu
Gata ka kawen, canden poe meurah
Ta tinggai ayah, ka deungon ibu
Gata ka tajak, uloen ta kubah
Lam dada reusah, leugah teuharu
Kiban hai aneuk, meuhuet yah ceugah
Gata ka leupah, ban seugah padu
Lakoe teuh kana, hudep han susah
Moga di ayah, beu tatem saweu
Teukeudi singoh, gata yah kubah
Sipue keuneubah, keu intan ayu
Meuhoe hai aneuk, yang taboet langkah
Sopan meutingkah, ngat na urueng eu
Ngon urueng lingka, neuk jaga ukhwah
Budi beu ceudah, leumah leumbut su
Tuloeng hai aneuk, kawoem yang susah
Sulueng bu kulah, ubee yang mampu
Seukian dile, keunoe loen singgah
Meuah hai ayah, dan teungku teungku
Kadang na sajak, seugak hana pah
Neu tulong peupah, bagoe neu bantu
Ka padan buhu, leusu han ciedah
Meuah hai sahbah, bek neu khuen sapue
Hudep beu makmu, doa keu Allah
Hudep beu cirah, lagee buluen hu.
Pena Kinet BE
Posting Komentar