Ingkar ngon Sumpah Wate yoh di Gle

Jampang ka duroh, pucok o'en lawah
Dalam uroe crah, geu adee gambe
Bak gara-gara, hawa peng mirah
Gadoh maruwah, hana jie pikee

Amanah wali, ka lhueh neu kubah
Bangsa meutuah, bek ta meupake
Jasa di wali, sudi ka leupah
Bak hie si ulah, hana meuyum lee

Wahee eo bapak, lam pomeurintah
Ingat seujarah, bangsa boehate
Syahid dum wareh, bak geuroe darah
Demi keu titah, bak peu thuen Adee

Di wali Nanggroe, ka lhueh neu kubah
Saboh peunayah, cara cok wasee
Seusama bangsa, kompak bek bicah
Bek ta meuplah-plah, bak rupah Rupe

Loe that di Aceh, wali neu keubah
Tinggai seujarah, meutan soe pike
Oh ban ka jiduk, lam geudong meugah
Rakyat yang susah, tan di pakoe le

Jameun yoeh dile, ka jie meusumpah
Peu thueun maruwah, baten ngon lahe
Meusoe han ikot, ka jie peusalah
Teubiet bak babah, dum haba jahee

Jinoe ngon musoh, jep ie saboh glah
Lam geudong meugah, sapat bagi fee
Hana di pakoe, yang wali peugah
Jie tinggai sumpah, hana jie pikee

Yang leumpah paleh, wahee oe ayah
Hukom geu keubah, jie tuka takee
Le kiban meuphom, nyan badan Dayah
Hingga teucurah, keu awak Kafee

Bak plah peura'e, bak sang pah han pah
Hingga musibah, laot deungon glee
Rakyat jie kuerbeun, deumi peng mirah
Meuheut peunayah, beu mewah sabee

Salah ngon wali, murka ngon Allah
Hingga juet susah, Ban sigoem saree
Meusoe hai ummi, yang ta peusalah
Supaya jeulah, tanyoe tung adee

Aceh Nanggroe loen, silahon ceudah
Jie thee that meugah, sabee le kafee
Ka ruyang rayee, bumoe poe meurah
Kadoek lam titah, bak weuk peura'e

Bek pudoe hate, salah bak langkah
Jinoe oh salah, tan soe pateh lee
Kabeh dum ingkar, janji ngon sumpah
Keurbun roe darah, meurana sabee

Dum aneuk yatim, jinoe ka susah
Meutan le ayah, syahid dalam glee
Gata meuseunang, lam geudong meugah
Di ateuh darah, keurbuen ngon budee

Wate kompanye, janji ta peugah
Abeh ta ruah, dum ta peu lahee
Rupa jih janji, ka mameh lidah
Supaya mudah, tamat peureutee

Meusang kali nyoe, teungku meutuah
Han pue neu surah, neujak meu ca'e
Ka dua blah thon, rakyat thuen susah
Bak deumi leupah, gata lam acee

Pakoen oh jinoe, male ta peugah
Ka leumah salah, rakan boehate
Rakyat ta peungeut, sidumna parah
Bak demi titah, gata cok hasee.

Pena kinet BE