MOU Helsinki

Jeh aneuk Tulo rante'ut taloe blang
Si darut canggang rante'ut taloe gle
Parang ngon Bude kabeh dum tacang
Kiroeh deungon prang jinoe hana le

Ka tinggai mandum Catok di ladang
Si aneuk bayam ka juet pot wase
Kanot ngon pireng tinggai di rangkang
Ija seumbayang pieh tinggai jie gle

Bintara mandum atoe baresan
Jiwoe bak pangdam jak seurah Bude
Karena katroh saboh peuneusan
RI deungon GAM meuprang hana le

Yoh wate dame na peujanjian
Mameh ban intan tinta meu-ukee
Seutuju mandum Teungku lam sidang
Meutan soe ek pham rakan boehate

Peukeuh Aceh nyoe ka jiplah lapan
Atau pieh rakan jie peubloe hase?
Meutan soe teupu, Allahua'lam
Adoe ngon abang ka jie meupake

Deungon MOU peumameh lisan
Dumna ka korban hana jie pike
Mulai dari phon Seulawah agam
Sampe Blang lancang gop pajoh hase

Meuhoe peumimpin darah peujuang
Meupue tujuan di dalam hate
Meupue keuh film tingoh berjalan
Sebe urainvdeuh hana pre-pre

Meuhoe dum waki anggota dewan
Pakon that santai neuduk lam ace (Ac)
Neu kalon rakyat jeh pat dalam blang
Reu'ah geu paban keu ie beu jile

Di gata mangat sabe bak jalan
Deungon ajudan neuduk lam ace
Pue-peu yang meuhuet mandun neu-gulam
Loe that anggaran nibak neuweuk fee

Rakyat lam gampong ule geu tumpang
Hancoe harapan anuek hana le
Kadang ka syahid di dalam seu'uh prang
Hai teungku abang beuna neu pike

Aneuk Leuk jipoe u puloe Sabang
Puwoe sikarang pucok bak awe
Kuta ngon pasi susah hana ban
Aceh lon sayang maruwah tan le

Bak weuk peura'e sang suah meuprang
Di awak dewan suah meupakee
Jeh eksetutif bloe kapai teurbang
Sagai han padan wate ta pike

Nyan APBA golom di sahkan
Aleh pue suai lambat bukon le
Di legislatif han jibie reumbang
Bak sagai-sagai jitem meusinde

Alah hai tukri aleh pakri ban
Bangsa lon sayang jitipe sabe
Hukom ngon Qanun hana meu'oh ban
Uroe ngon malam jie tuka take

O'hnoe meumada ulon keumarang
Meupat yang irang bek teupeh hate
Meu'ah lon lake bak teungku abang
Kadang han paban haba lon uke.

Pena Kinet BE