Assalamualaikom, kawoem di teumpat
Izin sigoe rap, ulon meurampoe
Teuntang hareutoe, si tambeh ladat
Meupat yang silap, peu butoi sigoe
Mantong that manyak, seunak neu lihat
Si adam leugat, ban rayoek baroe
Meupat na buhu, sulue han teupat
Keunoe neu peurap, neu teugor beutoe
Hai nyak, leumak boh pukat
Tanglong buleukat, meu silee ijoe
Meu bek teulanjoe, bak ta meu upat
Loen takoet silap, tuboh teuh kufoe
Tajak u jambi, meulinteung langkat
Bungong jambe klat, ka ulat injhoe
Bak bana gaseh, seudeh ka silap
Ban kana pangkat, ka jie ek bahoe
Jampang breuh baroe, taloe breuh leukat
Juengki meu jungkat, ka lingoe jamboe
Bek salah tutoe, dengon keurabat
Sidumna hebat, akai bek choe choe
Meu kada o'en u, meulangu bakat
Jampeh lam pukat, ka jimoe bak oe
Beh pajan ta thee, o'eh ajai peu rap
Troh malaikat, oeh tuboh basoe
Meudrang hai aneuk, suleuk u kiblat
Hadap u barat, yoeh mantong seunggoe
Singoh o'eh tuha, ka leumoh urat
Hana pah lafadz, oh ta meu tutoe
Tuntun ileume, tamee lam jirat
Amai beu mantap, keu pangkai dudoe
Bek salah peubut, jeuhuet keu kaplat
Singoh geu laknat, gata aneuk eo
Allah aneuk oe, baca riwayat
Aceh nyoe hebat, ban sigom nanggroe
Dum urueng malem, jameun that hebat
Allah hazarad, keuramat jaroe
Ban leumah buluen, sadeup di barat
Tanda hai sahbat, musem meu gantoe
Meumada dile, si rante fakat
Meunyoe na silap, meuah keu adoe.
Lewan tulesan, panton loen intat
Lam seuni fakat, loen tuleh jaroe
Kadang na tutoe, pudoe ngon silap
Meuah hai sahbat, wareh rakan droe.
Pena Kinet BE
Posting Komentar