Edisi Hiburan !!
Oh teuka ujuen, musem peungireng
Sayang that kareng, di dalam uroe
Rakyat ka sosah, lahee ngon baten
Dum urueng malem, kabeh neu'iem droe
Meukruseumangat, Jeumpa di Bugeng
Hanyoet dum ranteng, dalam krueng panjoe
Nanggroe yang makmue, meugah ngon canden
Cuma meu salen, bak kisah lampoe
Karap beh donya, ka jie keulileng
Dipoe ngon denden, seupanyang uroe
Kiban ta reutang, pukat nibak dreng
Sayang pawang Ben, Darat tan meuhoe
Loen tamse haba, tuah bak areng
Raya bak ta khem, dalam meuligoe
Ngon licek hate, bak ta keureuleng
Rakyat ta zhalem, hana ta pakoe
Wahee rakan loen, Ampon di manggeng
Eo cuda Baren, Binoe di Meutroe
Dum urueng inong, meulinggang Rampeng
Geu kaloen meuchen, Ratu Peundopoe
Di cut kat Ratu, rap han ek ta khem
Ka lagee siben, ban Tumee Jaroe
Hana pree wate, Gamba Geu Posteng
Gadoh keulileng, Peubeh peng Nanggroe
Yang leupah ladat, leugat bak ek rheng
Hanjuet di komplen, le aneuk Nanggroe
Jie khuen primitif, deungon pue laen
Meunan hai polem, leumah tiep uroe
Hayeu loem rakan, urueng di sampeng
Yang Sa'h bak polem, dum beurangkahoe
Meusang Nanggroe nyoe, Tan hak yang laen
Hingga geu puseng, ban galak jaroe
Sayang biet rakyat, mata meuleng-leng
Bak harap boh reng, beu makmue adoe
Awai dum janji, mameh teusalen
Bak lidah licen, teubiet tiep uroe
Nyan Dum Anggaran, han ek di puseng
Bak reupah boh jreng, ka putoh taloe
Nyan APBA, bak hie ka meu-jen
Ka saleng tudeng, adun ngon adoe
Bak sang ta simak, roeh han ek ta khem
Jeh urueng bureng, ka jiemat Nanggroe
Jie khuen Primitif, meusoe yang komplen
Sayang that dalem, binoe ngon lakoe
Oh noe seukada, panton loen sunteng
Meuah bak dalem, nyoe teupeh asoe
Bek saket igoe, oh wate neu khem
Panton loen posteng, neu baca sigoe.
Pena Kinet BE
Posting Komentar