Bangsa Lon dum Kabeh Tuwoe

Assalamualaikom, Kawoem lam Nanggroe

Adun ngon adoe, Manduem seureuta

Izin sibayet, Uloen meurampoe

Loen meuhareutoe, Sijabet sastra

Ijoe dalam gle, Si naleung Lakoe

Ceudah di Nanggroe, Meubareh kuta

Saboh meunalah, Kisah loen pasoe

Loen tuleh jaroe, Roet donya maya

Bangsa geutanyoe, Duem kabeh tuwoe

Tan geuturie droe, Biek nyang mulia

Seujarah jameun, Bak saboeh uroe

Yoeh karue Nanggroe, Lam seuh prang raya

Ban kana pangkat, Rumoh ngon moto
Tanyoe ka laloe, Keu seujarah Bangsa
Kabeh taboeh meueh, Ta reupah busoe
Hasee di Nanggroe, Jamee u luwa

Lagee di Nagan, Ta nging yoh baroe
Bumoe geutanyoe, Goep yang keulola
Abeh dum jie kueh, Tanoeh Aceh nyoe
Geutanyoe laloe, Laroet lam dawa

Laloe meupake, Adun ngon adoe
Cut kak ngon Cutpoe, Meunan ciet sama
Seuhingga akhee, Geutanyoe rugoe
Wasee di Nanggroe, Tan soe le jaga

Wahee bangsa loen, Meubek le laloe
Bek gata tuwoe, Keu cita-cita
Jak ta meusaboh, Ta peugot Nanggroe
Bek le sabe droe, Tanyoe meudawa

Bak teulah sithon, Di urueng meugoe
Teulah si uroe, Ureueng meurusa
Karap lhe blah thon, Geutanyoe rugoe
Bek le meulaloe, Ngon peng griek luwa

Oe`h noe meumada, Panton loen pasoe
Meuah keu loen nyoe, Na salah haba
Meunyoe na sajak, Reumbang han pudoe
Neu tulong adoe, Neucie peuhija.

Bak kali laen, Loen sambong jaroe
Hikayat Nanggroe, Aceh loen cinta
Sama ta jaga, Pusaka Nanggroe
Wahee eo adoe, Manduem pembaca.


Pena Kinet BE