Watei loen ingat, yoh saboh masa
Teuroe ie mata, seudih bukon le
Aceh seuramoe, meugah mulia
Jinoe ka ceula, leuma deuh lahee
Bak singgasana, purnama teuka
Geumilang cahya, laoet deungon gle
Dilee di Aceh, rakyat seujahtra
Walau lam lara, lam tam-tum budee
Rakyat fanatek, geu ilah daya
Aceh meurdeka, beu glah bak kafee
Walau pun syahid, bak bila bangsa
Abeh ngon harta, hana geu pikee
Salah si kata, oh geu meu basa
Bak uram dada, jie thoek ngon budee
Bak demi gata, di dalam rimba
Gagah usaha, gue gileng padee
Adak pih kadang, seu alakada
Keudeh lam rimba, keu seu'on cupee
Bak demi gata, peujuang bangsa
Rakyat jie siksa, le teuntra jahee
Ban jinoe gata, ka juet keu raja
Rakyat jeulata, hana ta pikee
Meupat nurani, lam hate gata
Tuwoe keu jasa, rakan bohate
Bukoen meu tasuem, si gumpai sira
bukoen meu kira, bue saboh cupee
Yatim lam gampong, ngon inong janda
Jie roe ie mata, rap hana pre-pree
Peureulee keu kamoe, oh toe pilkada
Ta ulang rika, kisah yang lanjee
Pue keuh lam hate, na tipue daya
Hingga ta siksa, baten ngon lahee
Kamoe rakyat nyoe, kon lamit gata
Yang juet ta jeungkai, ngon sikrek supre
Yang komoe meuhuet, hai anuek bangsa
Sama saudara, meu bek ta meupakee
Hamtoem meulake, ta balah jasa
Walaupun lara, luka lam hatee
Yang kamoe lakee, bak urueng gata
Aceh tercinta, beu glah bak kafee
Pue maksud dali, lam UUPA
butir tan nyata, meu ubee padee
Peu keuh butir nyan, ban lumpoe seunja
Rang kajan masa, hana meu hasee
Cuba neu pike, ngon ulee mata
Aceh ta cinta, jinoe rap reule
Tanyoe jie hina, hana pre masa
Pue keuh di gata, ka buta hatee
Aqidah Aceh, kabeh teu ceula
Biek-biek di lua, jinoe deuh lanjee
Aceh di peulhon, le awak jawa
Gata syedara, teuim lam Acee
Pakoen juet teudong, sayueb geureja
Pasca teutanda, damee Helsynke
Pue kueh di gata, utusan lua
Yang di seungaja, di yue le kafe
Teurasa supoet, bintang keujora
Purnama faja, reudok toep mate
Aceh loen cinta, si umue masa
Pajan meurdeka, rakan boehate
Hukom di Aceh, meu babi-buta
Rakyat jeulata, di hukum sabee
Meunyoe meukasus, ngon awak jawa
Meutan meuhaba, seungap bukon le
Jinoe karap troek, uroe pilkada
Jak peudeh muka, rata dum juree
Deungon ulama, peugot acara
Peudeh bak bangsa, mangat bek ganje
Singoh ban meunang, dalam pilkada
Mandum jie lupa, rakan boehate
Rupajih mandum, fikti belaka
Bak tarek sewa, di kinet BE
Meunyoe kali nyoe, neubi suara
Gelap sang masa, Aceh hana le
Ji teume plah lhe, Aceh ta cinta
Bak demi tahta, jinoe teu pike
Hana di ingat, jasa syuhada
Yang kuerbun jiwa, jameun dalam gle
Yang na di ingat, cuma rupia
Soal keu banfsa, hana jie pike
Peu keuh akan juet, di Aceh raya
Lam huru-hara, sang hana pre-pre
Meunyoe pemimpin, meu iming tahta
Akan ceulaka, Aceh loen Lahee
Keupue MOU, lam bingkai kaca
sapue tan nyata, hana deuh lahe
Yang na ciet leumah, lagee di banda
Teumpat meupesta, dum awak lonte
Pue keuh nyan butir, pasca teutanda
Peudong geureja, keu awak kafe
Pue nyan geu suroeh, oleh paduka
Hingga keucewa, bangsa boehate
Atau sebalek, dari tertera
biek-biek yang lanja, tajoek peura'e
Kamoe pribumi, tabie ie sira
Keu biek di jawa, madu lam cupe
Kasep siploh thon, ta tipee bangsa
Bhah peu meurdeka, bak hie hana le
Yoeh wate lam glee, benci keu jawa
Akan bhineka, gata khuen kafe
Jinoe ka leumah, meusoe yang dusta
Nyan pancasila, soe tabek sabee
Jeh mirah puteh, oh upacara
Soe hening cipta, rakan boehate ?
Pena Kinet BE
Posting Komentar