Tuwoe keu Jasa Urueung Tagun Bue wate yoh di Gle

Assalamualaikom, ampoen ngon Cut bang
Sahbat ngon rakan, kuta deungon glee
Saleum uloen pleu, gantoe sapaan
Wajeb bak rakan, jaweub beusare.

Deungoe hareutoe, si ujoe Peusan
Kon Ungken keusan, keu Breuh sicupee
Seumanjak Nanggroe, damee tan le prang
Loe that Pahlawan, jie duk lam Ac.

Tanyoe Pujoe Poe, Allah Ya Tuhan
Yang Peujuet Alam, laot deungon gle
Yang bie keu tanyoe, Rahmat Cobaan
Sehingga Badan, seunang deuh lahe.

Seulawet Saleum, keu Rasul pilahan
Sidroe janjongan, Nabi Yang Akhe
Ka geuba tanyoe, Bak jalan tuhan
Dilee supoet klam, teurang meuble-ble.
Keu Al ngon Sahbat, dum seukalian
Yang ka sapue pham, ikoet Pang ulee
Mandum Ulama, sama ta paban
Lam lindong tuhan, di Yaumil Akhe.

Tamoeng lam kisah, dilee masa Prang
Ramee Peujuang, ka geu ek u gle
Rakyat yang maguen, taguen masakan
Geu intat rijang, suloeh han toem pre.

Cut kak lam gampong, lahoen geu sayang
Akan Peujuang, Nanggroe Boehate
Rayoek Peuranan, geujak bantu Prang
Walau di Ancam, jie timbak Mate.

Meutan geu takoet, Nyawong geu Korban
Walau pih badan, Jie hantam Bude
Bak demi gata, para Peujuang
Geu rila Badan, Peu taroh hate.

Sigumpai Lada, tinggai lam reungkan
Geujak u Pekan, jak Publoe Pade
Tuka Deungon Breuh, aree si gantang
Untuk makanan, Peujuang di Gle.

Rayoek that jasa, meutan balasan
Meutan jie pandang, ngon mata Hate
Oh ban ka damee, Nanggroe tan le Prang
Jasa urueng nyan, meutan soe pike.

Asee di Aceh, leubeh Meu Kuyan
Gata peutimang, Pakoen han Ade
Pakoen juet tuwoe, Jasa Urueng Nyan
Yang jok makanan, yoeh gata di Gle.

Seumeunjak gata, kana jabatan
Tutue Jeumeurang, gata koh Rante
Raket gata phoek, gata peukaram
Seu-olah sang-sang, hana meunyum le.

Seudeh teu ingat, keu kisah silam
Masa dalam prang, ta tuntut Ade
Ka ruyang Rayee, Aceh loen sayang
Hana Saboh pham, Urueng lam Peurte.

Di kamoe Rakyat, jai that ka Korban
Darah Meukubang, meu sang han thoe le
Aneuk ka Syahid, sideh lam seuh prang
Adoe ngon cut bang, hana geuwoe le.

Seugah leuksana, umpama kacang
Leumoe dalam blang, hana keulike
Pakoen urueng nyan, tanyoe lupakan
Yang dile rakan, Sumbang Bue ugle.

Pue keuh geutanyoe, hana pikiran
Atoe pieh abang, ka teutoep hate
Ek sampee tuwoe, sidumna Peuran
Janda Meulang-lang, hana, soe pike.

Teukeudie singoh, beudoeh urueng nyan
Neutung balasan, wap saket Hate
Ayah ka syahid, dilee dalam prang
Jibaa tuntutan, tunggee keulaye.

Meupue neu jaweub, wahee eo rakan
Nyoe singoh meunan, akan deuh lahe
Bak gara-gara, Meuheut jabatan
Jasa pahlawan, meutan ta pike. 

 

Pena Kinet BE