Meuheut Meunikah (Bagian-6)

Meuheut Meunikah

Assalamualaikom wareh ngon sahbah
Umi ngon ayah adun ngon adoe
Seulambong jabet lon sudep kisah
Lon sambong beupah ngon lintek jaroe


Episode keu nam haba lon surah
"Meuheut meunikah", judoel lam rampoe
Meupat na sirong puntong risalah
Eo rakan sahbah neu teugor sigoe

Allah poma eo hate lon gundah
Mantong meudarah meunan sang bagoe
Jiwa lon rangoe pikiran han pah
Lon ingat sumpah si nyak Tjut putroe

Bak mieng sang jile ie mata darah
Meunan ban reusah tuboh lon seungkoe
Lon eh han teunguet lon bleut pih susah
Ingat seujarah kisah lam lumpoe

Tjut adek buluen nyang rupa ceudah
Hanjuet meusihah pieh lon peutuwoe
Malam ngon uroe teubayang wajah
Sabe deuh leumah wahe poma droe

Hai jak lon dodi pudie oe'n lawah
Pucoek seumirah lon pot sikiloe
Wahee poma eo neujak beu bagah
Sigra neu peupah laen peugantoe

Meunan jie mariet poe banta Birah
Haba jisurah nibak poma droe
Hate lam rangoe luka meudarah
Saket meuleumpah jantong ngon asoe

Eo meundang pudi Putri Seumirah
Sayang meuleumpah akan Tjut bang droe
Malam ngon uroe hate lam susah
Bateu meunikah dua ngon adoe

Uroe meulingkeu seuminggu leupah
Di Tjut bang Dolah meulamun sidroe
Han sanggop baten geu takzem sumpah
Han ek geu kubah ratu Peundopo

Geuharap cinta oe'n Tube reubah
Kama teu-hiah peuratah busoe
Rupajih laeh janji ngon sumpah
Adoe meutuah jie bateu tempoe

Gata hai adek burek that tingkah
Tjut bang ta keubah ta tinggai sidroe
Hana lon teupue aleh pue salah
Putoh risalah gaseh ngon adoe?

Meunan meu-lageum di Tjut bang Dolah
Roet hape beukah geu tuleh rampoe
Bak dek Julaiha peusan geu keubah
Geurangoe kisah meu-sambong taloe

Seu'ot di poma eo nyak meutuah
Gisa neuk bagah keunoe tajak woe
Bekle ta pike ta lamun kisah
Ka keuheundak Allah wahe aneuk droe

Kajeut hai aneuk peutuwoe bagah
Gaseh ka leupah ka siploh uroe
Singoh mak mita laen nyang ceudah
Aneuk Da Mulah gampong Cot Kiroe!

Bekle aneuk lon ta ranggong pisah
Male lon leupah nyoe meunan bagoe
Jikaloen le gop hai neuk meutuah
Singoh jipeugah meu-macam hareutoe

Meukon nyan sidroe si bungoeng ceudah
Jai that si-ulah kuntom di Nanggroe
Ta deungoe aneuk nyang poma peugah
Gata beu tabah bek batat tuloe

Meunan geu seu'ot Tjut poe Ramulah
Mangat bek gundah Ampon samlakoe
Bak tingoh jiduk jibeudoh bagah
Nyak banta mirah langsong jijak woe

O'hnoe meumada lon ruet risalah
Meupat na salah meu'ah keu adoe
Kadang na haraf sajak hana pah
Cuba hai sahbah peubutoi sigoe

Episode tujoh lon sambong titah
Teuntang seujarah putroe Meuligoe
Judul lam sajak, "Meuheut meunikah"
Nyata lam kisah ulon hareutoe.


Bireuen, 02 Februari 2019.
Kinet BE