Ijoe dalam glee, sintang dum seulu
Indah oeh ta eu, silala mata
Rihon lam hate, meuhoe loen peu keu
Meusang sep rindu, keu dek Dahlia
Bintang di langet, meu blet ban lampu
Cahya leumpah hu, peu seumu jiwa
Loen lageum gaseh, rinteh lam qalbu
Keu Bungong meulu, seulanga muda
Meupagiep cinta, meu hapiet pilu
Kisah yang leuhu, jinoe ka cupa
Seu olah rasa, hana le syahdu
Lagee sembilu, meugureh dada
Andai yoeh awai, dile loen teupu
Han uloen tabu, bijeh boh lada
Rugoe that tuboh, kiroh lam semu
Lampoh loen pageu, jinoe gop jaga
Siniram donya, ujuen peu sinteu
Jilee lam alue, aroh ie raya
Loen puga gaseh, loen seupeh rindu
Duroh meu direu, cinta yang seutia
Adoe pujaan, si kuntom meulu
Lam lika liku, hana meu haba
Meupue salah loen, hai mampang ayu
Hingga juet karu, geutanyoe dua
Dilema hate, meu rande bisu
Lagee empendu, jioh geulora
Simponi cinta, teu ireh sayu
Meutan yum rindu, yang uloen rasa
Geulumbang laot, riboet ji meusu
Angen di timu, peu saloh bahtera
Kumudoe cinta, patah meu siseu
Ka beukah layeu, gaseh asmara
Buih peu lagak, seugak riyuek hu
Gadoh lam lingku, intan permata
Impian hate, tan lee meunyatu
Takdir penentu, mandum sigala
Loen ujie tuleh, si bareh lagu
Walau pih buju, tan meu suara
Kicauan suleng, meu tan le merdu
Kabeh gadoh su, dengoen ie mata
Gurauan cinta, sia loen padu
Hamparan batu, meunusok jiwa
Tuboh ka pijuet, mata ka sayu
Meu randeu randeu, han ek loen lupa
Seu laeh pesan, loen reuntang di keu
Geulantoe loen eu, wajah adinda
Keunangan dilee, di masa lalu
Leumah deuh loen eu, dalam nuansa
Poto bak binteh, teu seurireh bisu
Loen pandang sayu, ngon dua mata
Meutan peutumun, ALLAH tuhan ku
Ka putoh tutu, Gaseh asmara.
Oh noe meumada, loen antok buhu
Kadang leupah su, bak peugah haba
Meuah loen lake, bak Cut dek ayu
Doa ngon Restu, gata bahgia.
Posting Komentar