Judul: Hoka Raja Loen
Oleh: Adam Zainal
Kayee dalam gle, rande geu teubang
Sayang seumantang, hana teu hiroe
Wahee eo wareh, poe banta seudang
Beudoh hai sayang, bek lam lumpoe
Si gande nanggroe, pawon meueh intan
Di dalam reugam, gadoh han meuhoe
Hoka raja loen, hai adoe badan
Tan leumah ruman, sinoe di meunggoe
Puwoe seuneusap, gapoh lam gawang
Lagee yoh asai, bak saboh uroe
Rihon anuek nda, keu ayah sayang
Hana neu riwang, jak saweu adoe
Peunutoh hukom, qanun ngon reusam
Hana ber jalan, di dalam nanggroe
Pakoen juet meunoe, gaseh meu lang lang
Adoe ngon abang, kabeh jie meu lhoe
Alah ku dodi, loen do da idang
Jaeh silayang, ka putoh taloe
Tawoe hai aneuk, boheta badan
Ta papah peran, peu timang nanggroe
Nanggroe meu wasee, jahee that kejam
Maksiat that reumbang, hana pree uroe
Adak na raja, meutroe ngon sultan
Laloe hana ban, dalam meuligoe
Jinoe ka leumah, jayeh ta pandang
Demi jabatan, atjeh ka kachoe
Dum aneuk cuak, leumak kon wayang
Kana si gupai, bungkoh meu asoe
Sayang seu laeh, aneuk peujuang
Jioh that tinggai, hana soe pakoe
Tapi meu setia, dalam baresan
Han jiweh sagai, tanglong bak panjoe
Hoka raja loen, bijeuh pahlawan
Aceh loen sayang, beugot neu pakoe
Bek ceulah ruweung, jareung lam genggam
Meu bek ngon lawan, neu peu saboh droe
Neu sayang kamoe, rakyat bineh blang
Bukon harapan, saka sikiloe
Maruwah aceh, bek sampee irang
Bek tergadaikan, martabat nanggroe
Do'a ta lakee, wahee eo rakan
Bak ALLAH sajan, tanyoe leung jaroe
Supuya aceh, troh kejayaan
Lagee yoeh awai, bak saboh uroe
Posting Komentar