Judul: Peusan Ayahnda
Oleh: Adam Zainal
Hai jak loen dodi, sinyak loen doda
Lageum dieng banta, nyak putroe aceh
Ban singoh rayoek, poe seudang muda
Akan ayahnda, gata beu saleh
Bujue angen gle, liwi utara
lam ayoen ija, loen radeu tasbeh
Ta tron hai anuek, keunoe u tika
Tajak le sigra, gata jak tak teh
Allah aneuk eo, ingat keu desya
Bek laloe mata, hai banta meugeh
Donya nyoe fana, leumah ka nyata
Iman ta jaga, hai aneuk aceh
Alah ku dangdi, sudi bungong la
Yup kaye raya, intan teuleubeh
Jaga hai aneuk, maruwah gata
Tutoe bek lanja, rakan bek teupeh
Bungong mangat be, yup kaye raya
Cicem meubura, meukawan takeh
Sari yang indah, ceulah bek cupa
Jaga mahkota, hai nyak buluqeh
Meunyoe koen jinoe, ta sapeh jiwa
Singoh oh tuha, sahoe han juet weh
Sabe keuliru, karu meu haba
Deungon syedara, ka meu kleh meu kleh
Hai jak loen timang, timang kupula
Meu lageum cinta, loen jaga bijeh
Ban manyak dile, loen puga gata
Wate ka kaya, bek ta peu eleh
Deungo hai aneuk, haba ayahnda
Bek sungsa muka, wate gop cukeh
Seusama wareh, beu tatem jaga
Tulong si bansa, meunyoe na leubeh
Hai meu preuk, ka meupreuk rawa
Bace ngon nila, jie kuleh kuleh
Oh wate singoh, gata duk raja
Rakyat jeulata, atoe beu bereh
Jak loen sibu, seunaman muda
Pucok keupila, tapeh beu ceh ceh
Do'a loen puwoe, bak tuhan Esa
Muga seujahtra, gata beu saleh
Lage Syah e nyoe, peuneusan loen ba
Keu banta Muda, loen tuleh sareh
Meunyoe na salah, bak seugah bahsa
Meuah loen pinta, kurueng ngon leubeh
Posting Komentar