Judul: Meuhuet Neunikah 1
Peunuleh: Adam Zainal
Hai krueseumangat, lamat lam kanto
Bek le teu taho, ka rap poh blah
Si naskah kisah, keunoe uloen jhoe
Teuntang sijudo, gaseh yang leupah
Na sidroe dara, tingoh preh lintoe
Meu heut hai bak eo, di jak meunikah
Hingga teu curah, haba lam tutoe
Sigra abang oe, neu lamar bagah
Pajan hai abang, hidang neu atoe
Mahkota judoe, pinueng teu plah plah
Loen harap cinta, bek tahoe ganto'e
Adek abang eo, pajan neu peu sah?
Han ek adek duk, sabee lam taho
Suah um kasoe, oh tinggi darah
Dak juet buluen nyoe, taduk si bahoe
Sideh lam kantoe, tanyoe meu nikah
Meunan jie marit, ceuding boh keundoe
Meu huet keu lintoe, cut abang gagah
Dak jeut beu sigra, geu eh lam kasoe
Galah kumudo, kana yang ilah
Bahtera cinta, ka lhueh teu atoe
Peungayoh jaloe, hias beu cidah
Oh leupi badan, na soe peu beutoe
Gaseh si judoe, beu meu gairah
Seuot cut abang, bak putroe ijoe
Saba adoe eo, hate beu tabah
Teubi keu ulon, bacut teuk tempoe
Bak buluen lhe nyoe, loen ba meunalah
Bak teungku imum, ka lhueh loen sampoe
Rauh loen hiroe, kana urueng cah
Lam muwafakat, ta mumat jaroe
Jak peujok but nyoe, keudeh u lipah
Adek bek susah, hai bungong nanggroe
Janji abang nyoe, kon mameh lidah
Ngon ikhlas hate, loen lamar adoe
Supaya tanyoe, sigra meunikah
Teutapi meu jan, haba lam rampoe
Akan kanda nyoe, gasin meu luempah
Meunyoe jeulame, seutara motoe
Han jadeh adoe, loen ba bu kulah
Karena uloen, koen aneuk meutroe
Susah han bagoe, mita peunayah
Acie hai adek, ta tanyoeng sigoe
Padum geu sampoe, manyam le ayah
Supaya abang, garang bak dingoe
Kadang geu tanyoe, jadeh meunikah
Nyoe lheploh manyam, han sanggop loen nyoe
Bah dek eh sidroe, ateuh peuratah
Meunan lam kisah, naskah loen ujoe
Meuah rakan droe, meunyoe na salah
Mantong episode, loen sambong dudoe
Judul lam rampoe, meuhuet meunikah
Seukian dile, panton hareutoe
Loen tuleh jaroe, di dalam madah
Meuah hai kawoem, binoe ngon lakoe
Kadang meucawoe, sajak kurueng pah.
Posting Komentar