Hai nyak, kuneng boh langsat
Putik jambe klat, puteh ban gadeng
Pakoen yoeh dilee, gaseh ta ikat
Lam juet juet saat, uloen ta peukhem
Lon jak u medan, meulinteung langkat
Bungong di barat, layee bak ranteng
Rasa hie seungkoe, lam dada meu lhat
Tamse ibarat teutop, ngon leumbeng
Setia payah loen, pupoek coklat
Pacoek loen ikat, di ateuh sandeng
Bungong loen pujoe, ka goep jak pikat
Rasa ban kilat, reudok lam baten
Sayang that jaloe, geulumbang hunyat
Musem di barat, teungoh peungeureng
Pakoen cinta loen, ta tiek lam bakat
Galah han meupat, loen mita laen
Peurahoe raya, bungka u barat
Peurahoe pukat, bungka u landeng
Andai loen teupu, cinta seusaat
Han uloen ikat, si bungong canden
Saket lam hate, ubat tan meupat
Rindu loen ucap, hana sibandeng
Rupa jih dali, hanya siasat
Ulon neu peurap, wap hana laen
Pakoen hai adek, gata tega that
Bak loen neu riwat, meurana baten
Loen teupue gata, sidroe peurawat
Ceudah lagak that, rupa nueh canden
Meunyesal hate, loen reuntang pukat
Oh musem barat, geulumbang puseng
Walau di hate, ubat goh meupat
Rela loen rawat, sampoe beuthoe kreng
Keupue lom guna, geunadeng leugat
Lam aroeh bakat, jaloe meu tunggeng
Mandum keunangan, bek le neu anggap
Kisah ka loen lhat, di ateuh sandeng
Andai biet jayeh, meutindeh pangkat
Aneuk peujabat, sanggop loen sunteng
Peucuma gata, sidroe peurawat
Gaji ubuet that, hana sibandeng
Cuma di uloen, koen urueng hebat
Dalam meularat, lahee ngon baten
Hudep seusaat, han meupue harap
Meupue loen ratap, urueng di sampeng
Sekian dilee, syah e loen intat
Lewat hikayat, ka uloen salen
Meuah loen lake, meunyoe na silap
Haba loen peukap, kadang na sumbeng
Lewat panton nyoe, loen intat surat
Keu bungong meunjrat, sikuntom canden
Meunyoe na ta eu, neu baca siat
Cukop loen harap, meunalah sunteng.
Pena Kinet BE
Posting Komentar