Seunja meugantoe, mata uroe lop
Langet meusagop, awan meulapeh
Sijuek meusap sa'ap, angen peubapot
Uloen meulimbot, ateuh teumpat eh
Hana teurasa, ie mata loen rhot
Jiwa sang gugop, hate nyum seudeh
Teu ingat kisah, yang ka u likot
Masa teupawot, cinta ngon gaseh
Luka yang awai, tan soe peubalot
Mantong meuparot, golom goet puleh
Jinoe ka teuka, lara meu turot
Rasa han sanggop, loen peutheun peudeh
Malam berlalu, seumaken larot
Hate loen kalot, rindu teuseureh
Meutamah teu moe, nyoe loen peuturot
Harus loen ikot, nasib meu gareh
Han le loen harap, adoe neu surot
Loen neu peulikot, sidumna paleh
Adak Cut dek jak, han le loen kawot
Sayang ka awot, cinta ka abeh
Menyoe bit keu loen, pinto ka neu top
Meu bek neu carot, hate neu cureh.
Neu tulak cinta, loen rasa cukop
Sagai han patot, loen neu peu Jayeh
Dak loen ba cinta, ngon leumah leumbot
Hate Ka supot, loen han neu pileh
Meu darah luka, lam dada busot
Bak nyum Sang teuboet, hate loen meukreh
Sidumna parah, luka neu rawot
Ibarat ta loet, Labang bak binteh
Meuruoh jaroe, asoe meu krot krot
Watee loen seubot, mama Keukaseh
Teusia leupah, cinta loen ceugot
Hanjeut loen lugot, duroe meubareh
Adak Loen Seumong, runong untuk cot
Awai gop sambot, laen di sideh
hana le guna, adak loen lanjot
Cinta loen salot, luka neu ireh
Bah le uloen jak, tapak loen beu'ot
Sumpah loen cabot, janji uroe jeh
Meuah loen lakee, haba keuneuchot
Keusoe Kadang rhot, panton loen tuleh
Kadang na gasa, Kata loen pa khop
Hana loen maksod, meuah hai wareh
Peunuleh: Adam Zainal
(Kinet BE)
Posting Komentar