Hudep Meulajang di Dalam Rantoe

Jeumpa di Bireuen, Bungkok u Gayo
Geulima putroe, Ka patah cadeun
Hudeup meulajang, Goh na sambinoe
Suah eh sidroe, Meubuluen-buleun

Alah hai Abu, Kiban ta khuen proe
Saket lam asoe, Bek le ta hiruen
Dak na kak ipar, Han jietem pakoe
Laloe ngon lakoe, Abi Lhok Mideun

Baroe loen peugah, Bak rakan jomblo
Di yueb bak Kiroe, Bek ka meulamun
Walaupun seudeh, Hate lam rangoe
Laen geulantoe, Mita bineh leun

Alah ku dodi, Seumaloe busoe
Bak utoem Panjoe, Geupeugot saleun
Neu mita siat, Keu loen cut putroe
Dara di Nanggroe, Yang caroeng magun

Han ek le taduk, Hai kak lam rantoe
Tuha meu-keudroe, Meunoe peukateun
Adak na cewek, Sideh di Nanggroe
Hanjuet rakan droe, Tacok peutumun!

Kon ka neu teuoh, Si dara jinoe
Galak di manoe, Lam laoet paseung
Oh meu-geuratan, Jie joek keu tanyoe
Kiban ta geuboe, Barang ka useung?

Tamselan haba, Meunan ta peupoe
Jatoe di meunggo, Ka patah cabeung
Meutan le suci, Kiban ta guboe
Meunajih jaroe, Semaloe Nalueng

Meunan lah ciri, Dara lawet nyoe
hanjuet ta peutoe, Meurie-rie urueng
Teutakot singoh, Meunyeusai dudoe
Awai that jipoe, Beurijuek utuen

Tan le peurawan, Pieh meuhai tuloe
Jeulamei putroe, Sideh di Deng Hung
Padahai apam, Kalhueh goep gilhoe
Bak saboh uroe, Di Guha pheng chung

Han ek ku karat, Wahee abu droe
Goet ku'eh sidroe, Seupanjang jameun
Eh daripada, meuramah duroe
Kon goet lam sagoe, Jiekap le Limpeun

Sayang keu nasip, Sabee lagee nyoe
Punggong teuremoe, Jie teume ruheung
Umue ka tuha, Ka kroet kulet dhoe
Judoh tan meuhoe, Leh pat meusareung

Aah ka keuh hoem, Wahee eo adoe
Han jilee kuwoe, Nyoe tan cut buluen
Malee kuh singoh, Ngon cupoe-cupoe
Loen mantong sidroe, Meurahueng-rahueng

Padahai manyam, Kasep lam jaroe
supree di toko, Ka siap ta leung
Tapi si dara, Nyang golom meuhoe
Nyoe koen bak asoe, Ta top ngon Pidueng

Meuleumpah saket, Wahee sambinoe
Hate ka rangoe, ie mata paseung
kalhueh dum kujak, Rap rata sagoe
Hana meusidroe, Dara yang cadeun.

Pena Kinet BE