"Meuheut Meunikah"

(Bagian-4)

Hai jak loen dodi, bujue oe'n Peundang
Angen oe'h malam, jie-poet ka bicah
Loen sambong lawi, asoe karangan
Judul pinangan, "Meuheut Meunikah."

Episode keu (ke-4) peut, loen tuleh karang
Haba keuluhan, gaseh meu-pisah
Untuk peumbaca, loen harap teunang
Haba loen gunyan, nyata na kisah

Riyeuk di pante, aloen geulumbang
Purnama malam, meu-lagam ceurah
Gaseh loen lageum, ranum di karang
Rasa loen timang, hate ka patah

Adek boehate, Putroe kayangan
Sang benci ruman, saket meu-leumpah
Neu paksa uloen, yue ba tunangan
Dudoe lage nyan, neu bateu titah

Allah poma eo, hate loen bimbang
Meusang han teunang, hudep lam susah
Meuseubab rande, gagal tunangan
Jiwa han teunang, sabe lam gundah

Kiban loen jaweub, duem peurtanyaan
Seudeh loen paban, bak rakan sahbah
Male ngon kawoen, meunyoe lage nyan
Eo boehate Nang, Meudua lidah

Gata hai adoe, bak pudoe reumang
Hate meugunyan, keulam lam sumpah
Lheuh ta meujanji, yue mee lamaran
Bak teungoh jalan, ta lake pisah

Ranup lam bate, siap ngon hidang
Bungkoh ngon manyam, sigra loen seurah
Keudeh u Lipah, loen mee rombangan
Meuheut jak tunang, putroe Rumbiah

Akhe nibak buet, jeuheut dek paban
Ta kirem peusan, haba meunalah
Adoe neu pudie, seu'it ngon lisan
Tanyoe hai Tjut bang, bek ta meunikah

Meunan geu seurit, lewat karang
Panton geu karang, di Tjut bang gagah
Hate ka seungoe, mata meulinang
Meusang han nyaman, sabe lam gundah!

Seu'ot Tjut adek, lintek rupawan
Meu'ah hai Tjut bang, dinda ka salah
Hana makeusud, loen jak peu-ayang
Gaseh Tjut abang, meu-ubeh geutah

Kasep eo kanda, Loen bie alasan
Neupreh loen tuan, o'eh abeh kuliah
Dua thon tempoe, loen joek keu Tjut bang
O'eh kalhueh sidang, tanyoe meunikah

Kanda bek guga, Hate bek goyang
Loen harap sayang, tanyoe bek pisah
Dinda di sinoe, rangoe jie peundam
Ingat keu Tjut bang, hate geulisah

Beu tabah hate, kanda loen sayang
Keudeh bak tuhan, mandum ta seurah
Allah ka neubi, saboh rintangan
Loen harap teunang, kanda bek susah

Han loen ingkari, janji pinangan
Dali tunangan, han dusta lidah
Loen ucap sumpah, dilee uroe nyan
Loen preh lamaran, bak Tjut bang gagah

Han uloen paleng, eo dalem tampan
Sampoe pieh pajan, loen preh troh langkah
Kanda bek susah, jiwa beu aman
Hudep beu teunang, ingat keu Allah.

Adek meujanji, han pudie angan
Han irang gumam, meusilet lidah
Seudia loen preh, sabe pinangan
Sampoe pieh pajan, kanda troh langkah

Meunan jie jaweub, saleub seumingan
Dalam karangan, jie bie meunalah
Kanda di sideh, seudeh koen wayang
Hate lam gumam, mantong that gundah

Seukian dilee, loen plee karangan
Singoh loem teuman, loen lanjoet surah
Episode limoeng, seunambong karang
Loen lanjut rintang, "meuheut meunikah."

Meu'ah loen lakee, deungon wassalam
Kadang han simban, haba loen surah
Meunyoe na sajak, tutoe han reumbang
Mohon teuguran, bak rakan sahbah.

Bireuen, 31 Januari 2019
Pena; kinet BE