Kruseumanga, Jeumpa kuneng o'en
Bungong teulason, nyang rupa ceudah
Deungon Bismillah, haba loen peu-phoen
Assalamualaikom, ucap keu sahbah
Episode 5 (limoeng), jinoe loen sambong
Meunyangkot judol, "Meuheut Meunikah"
Untuk peunggemar, Seuni ngon panton
Keunoe neu kunjong, neu baca bagah
Allah poma eõ, seudeh hate loen
Meusang lam jantong, luka meudarah
Lage umpama, jie toep ngon Rincong
Meunan poma loen, saket meu-leumpah
Baroe loen tanyong, bak bungong rihoen
Pakoen deungon loen, ta bateu nikah
O'eh ban ka siap, loen ba meu'eh pawoen
Bak tingoh juroeng, gata meu-tingkah
Jie ulah haba, meu-bagoe siroeng
Haba jie lanton, leumpah na mudah
Jie bie alasan, meu-ribe meu-thon
Jieyue preuh uloen, oe'h abeh kuliah
Meunan geu mariet, di teungku Ampon
Bak poma kandong, haba geu surah
Geu neuk calitra, kisah bungong roem
Nyang hantroh kunjong, gagal meunikah
Seu'ot jie poma, hai asoe jantong
Bek le ta ranggong, eõ banta mirah
Mungken ka takdi, tuhan Khadiron
Singoh aneuk loen, ta kaloen nyang pah
Laen ta mita, Bungong di duson
Yang budi santon, sopan ngon tingkah
Bek le ta ingat, ranum bungong roem
Wahee aneuk loen, gata beu tabah
Gata tan judoe, ngon dek Hayaton
Meubek aneuk loen, ta langgar titah
Tanyoe ciet gasin, hina bak kawoem
Gata eô Ampon, hate bek paseurah
Poma meujanji, eõ pudie rimbon
Judoe keu Ampon, loen mita bagah
Mangat bek rangoe, hate aneuk loen
Keumbe lam gampong, meuheut loen peusah
Demi keu gata, hai asoe jantong
Rela di uloen, lam reu'oh-reu'ah
Mita peugantoe, si bungong kuntom
Mangat aneuk loen, gata meunikah
Ta'iem jue hai neuk, bek le ta ranggong
Jie eu le kawoem, male meu-leumpah
Gata ka rayoek, wahee aneuk loen
Bek ta peumale loen, aneuk meutuah!
Singoh mak mita, Putroe ban iembon
Geulantoe kuntoem, si bungong birah
Gata bek susah, eõ banta Ampon
Meunyoe goet untong, tuhan peu-mudah
Meunan neu jaweub, poma di Anjong
Bak asoe jantong, nyak banta mirah
Jie'im bak jiemoe, tan le meuranggong
Seungap jieh langsong, hana le gundah
Sekian buhue, loen rateu panton
Meupat na sirong, neu coba peupah
Kadang na sajak, seugak han nyambong
Meu'ah keu uloen, hai mak ngon ayah
Episode keu-nam (ke-6), singoh loen sambong
Teuntang silason, Gagal meunikah
Untuk pembaca, peucinta panton
Keunoe neu kunjong, sigra beu bagah
Bireuen, 01 Februari 2019.
Kinet BE
Posting Komentar