Meuheut Meunikah
Kreuseumangat Jeumpa kuneng o'en
Bungong teulason nyang rupa ceudah
Deungon Bismillah haba lon peu-phoen
Assalamualaikom ucap keu sahbah
Episode limoeng jinoe lon sambong
Meunyangkot judol, "Meuheut Meunikah"
Untok peunggemar hikayat ngon panton
Keunoe neu kunjong neu baca bagah
Allah poma eo seudeh hate lon
Meusang lam jantong, luka meudarah
Lage umpama jitop ngon Rincong
Meunan poma lon saket meu-leumpah
Baroe lon tanyong bak bungong rihoen
Pakoen deungon lon ta bateu nikah?
O'hban ka siap lon ba meu'eh pawoen
Bak tingoh juroeng gata meu-tingkah
Jie ulah haba meu-bagoe siroeng
Haba jie lanton leumpah na mudah
Jibie alasan meu-ribe meu-thon
Jiyue preh ulon o'h abeh kuliah
Meunan geumariet di teungku Ampon
Bak poma kandong haba geusurah
Geuneuk calitra kisah bungong roem
Nyang hantroh kunjong gagal meunikah
Seu'ot jie poma hai asoe jantong
Bekle ta ranggong eo banta mirah
Mungken teukeudi tuhan Khadiron
Singoh aneuk lon ta kalon nyang pah
Laen ta mita Bungong di duson
Yang budi santon, sopan ngon tingkah
Bekle ta ingat ranum bungong roem
Wahe aneuk lon gata beu-tabah
Gata tan judoe ngon nyak Hayaton
Meubek aneuk lon ta langga titah
Tanyoe ciet gasin hina bak kawoem
Gata eo Ampon hate beu paseurah
Poma meujanji eo pudie rimbon
Judoe keu Ampon lon mita bagah
Mangat bek rangoe hate aneuk lon
Keumbe lam gampong meuheut lon peusah
Deumi keu gata hai asoe jantong
Rela di ulon lam reu'oh-reu'ah
Mita peugantoe si bungong kuntom
Mangat aneuk lon gata meunikah
Ta'iem jue hai neuk bekle ta ranggong
Jie-eu le kawoem male meu-leumpah
Gata ka rayek wahe aneuk lon
Bekta peumale lon aneuk meutuah
Singoh mak mita, Putroe ban iembon
Geulantoe kuntom si bungong birah
Gata bek susah eo banta Ampon
Meunyoe goet untong Tuhan peu-mudah
Meunan neu jaweub poma di Anjong
Bak asoe jantong nyak banta mirah
Jie'im bak jimoe tan le meuranggong
Seungap jieh langsong hana le gundah
Sekian buhue lon rateu panton
Meupat na sirong neu coba peupah
Kadang na sajak seugah han nyambong
Meu'ah keu ulon hai mak ngon ayah
Episode keu-nam singoh lon sambong
Teuntang silason gagal meunikah
Untok pembaca peucinta panton
Keunoe neu kunjong sigra beu bagah.
Bireuen, 01 Februari 2019.
Kinet BE
Posting Komentar